ठाणे : अनेक दशकांच्या उल्लेखनीय शैक्षणिक प्रवासाचा 90 वा वर्धापनदिन साजरा करण्याच्या निमित्ताने विद्याप्रसारक मंडळ, ठाणे यांनी विशेष सांस्कृतिक कार्यक्रमाचे आयोजन केले आहे. ठाण्यातील शिक्षणक्षेत्राला आकार देणाऱ्या या संस्थेने 1935 पासून अखंडपणे कार्य करत आज हजारो विद्यार्थ्यांचा विश्वास संपादन केला आहे. या महत्त्वपूर्ण टप्प्यानिमित्त रविवार 30 नोव्हेंबर रोजी संध्याकाळी 5 ते 10 या वेळेत ठाणे कॉलेज परिसरातील टर्फवर हा कार्यक्रम होणार असून तो सर्वांसाठी विनामूल्य खुला आहे.कार्यक्रमात प्रख्यात शास्त्रीय गायक पंडित ओंकार दादरकर यांचे गायन आणि सुप्रसिद्ध बासरीवादक पंडित राकेश चौरसिया यांची मैफल रंगणार असून, शिक्षण आणि संस्कृतीचा अनोखा मेळ साधण्याचा प्रयत्न यामधून दिसून येतो.
विद्याप्रसारक मंडळाचा चेंदणी रोड कॅम्पस—ठाणे कॉलेज आणि बेडेकर कॉलेज म्हणून ओळखला जाणारा—कला, वाणिज्य, विज्ञान, अभियांत्रिकी, व्यवस्थापन आणि कायदा अशा विविध शाखांमधील शिक्षणासाठी प्रसिद्ध आहे. आधुनिक पायाभूत सुविधा, हिरवाईने नटलेला परिसर, कौशल्याधारित प्रशिक्षण आणि उत्कृष्ट प्लेसमेंटच्या संधी यामुळे हा कॅम्पस ठाण्यातील अग्रगण्य उच्चशिक्षण केंद्र मानला जातो.संस्थेच्या कार्याचा आढावा घेताना डॉ. महेश बेडेकर यांनी सांगितले की, मंडळाच्या शैक्षणिक उपक्रमांचा लाभ आज जवळपास 17,000 विद्यार्थ्यांना मिळतो. नौपाडा, चेंदणी रोड आणि कोकणातील वेळणेश्वर अशा तीन कॅम्पसमधून प्राथमिक शिक्षणापासून पीएचडीपर्यंत सुविधा उपलब्ध आहेत. कायदा, विज्ञान, कला, वाणिज्य, व्यवस्थापन, तंत्रनिकेतन आणि अभियांत्रिकी या शाखांमधून 3 लाखांहून अधिक माजी विद्यार्थी आज जागतिक स्तरावर विविध महत्त्वाच्या पदांवर कार्यरत आहेत. 2009 मध्ये स्थापन केलेल्या लंडन अकॅडमी ऑफ एज्युकेशन अँड रिसर्च या आंतरराष्ट्रीय उपक्रमासह स्वतःचे विद्यापीठ स्थापण्याचा मनोदयही मंडळाने जाहीर केला आहे. “शिस्त, प्रगतीशीलता आणि मूल्याधिष्ठित शिक्षण हा ठाण्याचा आत्मा आम्ही पुढे नेत आहोत,” असे डॉ. बेडेकर म्हणाले. ठाणेकरांनी या सांस्कृतिक सोहळ्याला उपस्थित राहावे, असे आवाहनही त्यांनी केले.
